ការស្វាគមន៍លោកស្រី ចាន់ ស៊ីណាត ក្នុងមុខតំណែងជា ប្រធានការិយាល័យផ្នែកលក់របស់ក្រុមហ៊ុន​ Codingate Technology​។

នៅថ្ងៃទី ២៤ ខែមករា ឆ្នាំ ២០២៤ នេះ ក្រុមហ៊ុន Codingate Technology មានក្ដីសោមនស្សរីករាយជាខ្លាំងក្នុងការប្រកាសតែងតាំងលោកស្រី ចាន់ ស៊ីណាត ក្នុងមុខតំណែងផ្លូវការជាប្រធានការិយាល័យផ្នែកលក់ (CSO)។ តាមរយៈបទពិសោធន៍ និងជំនាញដ៏ស៊ីជម្រៅដែលលោកស្រីធ្លាប់បានឆ្លងកាត់ក្នុងកិច្ចគ្រប់គ្រប់ការងារផ្នែកលក់ ទំនាក់ទំនង និងប្រតិបត្តិការទូទៅ ដែលគុណសម្បត្តិទាំងនេះហើយបានសបញ្ជាក់ថាលោកស្រីពិតជាមានសមត្ថភាពស័ក្ដិសមលើការដឹកនាំក្រុមការងារផ្នែកលក់នៅក្នុងក្រុមហ៊ុន Codingate Technology ដើម្បីបម្រើសេវាកម្មស្របតាមតម្រូវការអតិថិជន បានយ៉ាងរហ័សនិងមានភាពបត់បែនលើគ្រប់កាលៈទេសៈ។

គួរឲ្យបញ្ជាក់ផងដែរថា លោកស្រី​ ចាន់ ស៊ីណាត ធ្លាប់បានបំពេញការងារសំខាន់ៗជាច្រើនក្នុងមុខនាទីជាប្រធានផ្នែកលក់សម្រាប់សាជីវកម្ម នៅតាមស្ថាប័នធំៗដោយទទួលបានលទ្ធផលល្អប្រសើរផងដែរ។ មិនត្រឹមតែប៉ុណ្ណោះ លោកស្រីក៏ធ្លាប់បានគ្រប់គ្រងទៅលើការលក់ភេទសេវាកម្ម ក៏ដូចជាផលិតផលផ្សេងៗគ្នាយ៉ាងច្រើន ដែលរួមបញ្ចូលទាំងការប្រើកាតទិញលក់ក្នុងពាណិជ្ជកម្ម ការចាត់ចែងប្រាក់បៀរវត្សរ៍ និងការបំពេញកិច្ចការងារដ៏ទៃទៀតទាក់ទងនឹងវិស័យផ្សេងៗក្នុងរាជរដ្ឋាភិបាល ស្ថាប័នឯកជន ធានាគារក៏ដូចជាគ្រឹះស្ថានមីក្រូហិរញ្ញវត្ថុជាដើម។

ឆ្លងតាមភាពប៉ិនប្រសប់របស់លោកស្រីក្នុងការលើកទឹកចិត្ត និងជួយតម្រង់ផ្លូវណែនាំ ក្រុមការងារ​ផ្នែកលក់ផ្សេងៗទៀត លោកស្រី ចាន់ ស៊ីណាត នឹងដើរតួនាទីយ៉ាងសំខាន់ប្រៀបបាននឹងការបន្ថែមគុណតម្លៃ នៃភាពស្នូលរបស់ក្រុមហ៊ុន​ Codingate Technology ទាំងមូល ដើម្បីឆ្ពោះទៅរកការប្រតិបត្តិការងារប្រកបដោយប្រសិទ្ធភាព និងមានភាពជាប់លាប់ដោយរួមផ្សំជាមួយនឹងការចូលរួមរបស់ក្រុមការងារជាដៃគូរផ្សេងទៀត ពោលគឺក្រុមផ្នែកទីផ្សារ​ និង​ក្រុមខាងផ្សព្វផ្សាយពាណិជ្ជកម្មផងដែរ។
វត្តមានរបស់លោកស្រីនៅក្នុងក្រុមហ៊ុន និងធ្វើឱ្យអតិថិជនទាំងអស់ទទួលបាន​នូវសេវាកម្មក៏ដូចជាដំណោះស្រាយបច្ចេកវិទ្យាដ៏ល្អបំផុតពីក្រុមហ៊ុន Codingate Technology យ៉ាងពិតប្រាកដ។

ទន្ទឹមនឹងនោះផងដែរ លោកស្រីក៏បង្ហាញនូវសមិទ្ធផលដែលធ្លាប់សម្រេចបាននៅក្នុងវិស័យផ្នែកលក់ និង​ការអភិវឌ្ឍអាជីវកម្មទៀតផង។ ដោយធ្លាប់មានបទពិសោធន៍ក្នុងការកាន់មុខតំណែងជាប្រធានការិយាល័យផ្នែកពាណិជ្ជកម្មនៅក្នុងស្ថាប័នឈានមុខគេកន្លងមក លោកស្រីសម្រេចបានលទ្ធផលនៃការលក់ស្របតាមគោលដៅ ក៏ដូចជាបានបង្កើតក្រុមការងារដែលមានសមត្ថភាពខ្ពស់សម្រាប់ភាពជោគជ័យបន្ទាប់ទៀតផងដែរ។
លើសពីនេះទៀត លោកស្រីតែងចាត់ទុកការចូលរួមពីសំណាក់អតិថិជនជាអាទិភាពជានិច្ច ហើយលោកស្រីតែងអនុវត្តដំណើរការបន្ទាប់ពីការលក់បានប្រកបដោយប្រសិទ្ធភាព ព្រមទាំងជំរុញបន្ថែមនូវកិច្ចសហប្រតិបត្តិការជាមួយភាគីពាក់ព័ន្ធផ្ទៃក្នុងឲ្យកាន់តែរឹងមាំថែមទៀតផង។

លោកស្រី ស៊ីណាតក៏ធ្លាប់មានបទពិសោធន៍ក្នុងវិស័យការងារពីមុនជាអ្នកគ្រប់គ្រងផ្នែកលក់ផលិតផលឌីជីថល និងជាប្រធានផ្នែកលក់សាជីវកម្មផងដែរ ហើយលោកស្រីថែមទាំងមានភាពប៉ិនប្រសប់ក្នុងកាផ្ដល់សេវាកម្ម និងនៅចាំជួយជ្រោមជ្រែងអតិថិជនតាំងពីចំណុចផ្ដើមនៃការលក់ ពេលកំពុងដំណើរការលក់ និងការដោះស្រាយបញ្ហាសម្រាប់លទ្ធផលនៃការព្រមព្រៀងលើសេវាកម្មស្របតាមតម្រូវការអតិថិជនជាដើម។ ក្នុងនោះទៀតសោត លោកស្រីសម្រេចបាននូវគោលដៅលក់ជាបន្តបន្ទាប់ ដោយទទួលបានអតិថិជនជាហូរហែរ រួមផ្សំជាមួយជំនាញក្នុងកិច្ចសហការប្រកបដោយប្រសិទ្ធភាពជាមួយក្រុមការងារផ្នែកផ្សេងៗទៀតផង និងសម្រេចគោលដៅរបស់ក្រុមហ៊ុនគួរឲ្យកត់សម្គាល់។

បន្ថែមលើជំនាញលក់ដ៏ចំណានដែលមាន លោកស្រី ស៊ីណាត ក៏មានសមត្ថភាពក្នុងការរកដំណោះស្រាយសម្រាប់បញ្ហានានាលើច្រើនបរិបទក្នុងវិស័យអាជីវកម្មផងដែរ។ លោកស្រីធ្លាប់បានបំពេញការងារយ៉ាងរលូនជាមួយនឹងលទ្ធផលជាទីគាប់ប្រសើរជាមួយនាយកដ្ឋានព័ត៌មានវិទ្យា (IT) ដើម្បីអនុវត្តការប្រើប្រាស់គ្រប់គ្រងប្រតិបត្តិការដែលគ្មានអត្តសញ្ញាណច្បាស់លាស់ ដោយធ្វើការស៊ើបអង្កេតយ៉ាងម៉ត់ចត់ក្នុងគោលបំណងការពារក្រុមហ៊ុនពីសកម្មភាពមិនគប្បី ឬការវាយប្រហារនានាជាយថាហេតុ។

ជាមួយនឹងការស្វាគមន៍យ៉ាងកក់ក្តៅពីសំណាក់ក្រុមហ៊ុន Codingate Technology លោកស្រី ស៊ីណាត បានថ្លែងដោយក្តីរីករាយថា “ខ្ញុំសូមថ្លែងអំណរគុណយ៉ាងស្មោះស្ម័គ្រចំពោះលោក សុខ សុភមង្គល​ ដែលជា ប្រធាន និងជានាយកប្រតិបត្តិ តំណាងថ្នាក់ដឹកនាំនៅក្នុងក្រុមហ៊ុនសម្រាប់ការផ្ដល់ឱកាសមួយនេះ ដែលអនុញ្ញាតឲ្យខ្ញុំអាចចូលបំពេញបេសកកម្មក្នុងដំណើរមួយរួមគ្នា ជាមួយក្រុមការងារដែលពោរពេញទៅដោយសក្ដានុពល។ ជាមួយនឹងបទពិសោធន៍ដែលខ្ញុំសន្សំមកជាច្រើនឆ្នាំ រួមមានការគ្រប់គ្រងការលក់ ទំនាក់ទំនង និងប្រតិបត្តិការទូទៅទាំងអស់ ខ្ញុំនឹងប្រើប្រាស់នូវសមត្ថភាពទាំងនេះឲ្យអស់សក្ដានុពល ដើម្បីរួមចំណែកនាំយកភាពជោគជ័យមកកាន់ក្រុមហ៊ុន ក៏ដូចជាបំពេញនូវរាល់តម្រូវការបច្ចេកវិទ្យាជូនអតិថិជន។ ការណ៍ដែលបានធ្វើការជាមួយនឹងក្រុមការងារផ្នែកលក់ដ៏មានទេពកោសល្យ ព្រមទាំងការផ្ដល់ឲ្យអតិថិជននូវអាទិភាពលើគ្រប់កាលៈទេសៈនៅក្នុងកិច្ចសហប្រតិប្តិការរបស់ក្រុមហ៊ុននេះហើយ ជាហេតុផលដែលធ្វើឲ្យរូបនាងខ្ញុំ មានសេចក្ដីរំភើប និងមានជំនឿជឿជាក់ទៅលើក្រុមការងារមួយនេះ ហើយនាងខ្ញុំបានត្រៀមខ្លួនរួចជាស្រេចក្នុងការចូលជាផ្នែកមួយនៃវឌ្ឍភាព និងភាពរីកចម្រើនរបស់ក្រុមហ៊ុននៅលើទីផ្សារប្រកបដោយចីរភាព”។
លោក សុខ សុភមង្គល ប្រធាន និងជានាយកប្រតិបត្តិរបស់ក្រុមហ៊ុនបានមានប្រសាសន៍ថា “យើងមានសេចក្តីសោមនស្សរីករាយជាខ្លាំងក្នុងការប្រកាសបន្ថែមនូវគណៈគ្រប់គ្រងជាន់ខ្ពស់ គឺលោកស្រី ចាន់ ស៊ីណាត ជាប្រធានការិយាល័យផ្នែកលក់របស់យើង”។ ជំនាញ និងបទពិសោធន៍ដ៏ឆ្នើមរបស់លោកស្រី ចាន់ ស៊ីណាត នឹងក្លាយជាមាគ៌ាដ៏សំខាន់ក្នុងការជំរុញកំណើននៃការលក់របស់យើង ដោយធ្វើឲ្យបា្រកដថាយើងមិនត្រឹមតែបំពេញបានការងារតាមតួនាទីដែលមានប៉ុណ្ណោះទេ ក៏ប៉ុន្តែយើងក៏នឹងផ្ដល់ការយកចិត្តទុកលើដំណោះស្រាយឌីជីថលដែលផ្ដល់ជូនលើសពីតម្រូវការរបស់អតិថិជន ក្នុងគោលបំណងពង្រីកនិងពង្រឹងទីផ្សាររបស់យើងទៅកាន់ជំហានបន្តបន្ទាប់ទៀត។