ក្រុមហ៊ុនបច្ចេកវិទ្យា Codingate Technology មានសេចក្ដីរំភើបជាខ្លាំង ក្នុងការប្រកាសជាផ្លូវការនូវវត្តមានរបស់ប្រធានការិយាល័យបច្ចេកវិទ្យា(CTOs)របស់យើងទាំង ៣ រូប នៅក្នុងក្រុមហ៊ុនសម្រាប់ពេលបច្ចុប្បន្ននេះ ដើម្បីពួតដៃគ្នានាំយកមកនូវ បច្ចេកវិទ្យាកម្រិតកំពូលរួមមាន បញ្ញានិម្មិត (AI) និងប្រព័ន្ធស្វ័យប្រវត្តិកម្ម សម្រាប់បម្រើជូនអាជីវកម្មគ្រប់ជាន់ថ្នាក់ប្រកបដោយគុណភាពខ្ពស់។

នាថ្ងៃទី ២៣ ខែ​មករា ឆ្នាំ ២០២៤ ក្រុមហ៊ុន Codingate ដែលជាក្រុមហ៊ុនបច្ចេកវិទ្យាឈានមុខគេនៅក្នុងប្រទេស មានក្ដីសោមនស្សរីករាយសម្រាប់ការប្រកាសអំពីការផ្លាស់ប្ដូរដ៏សំខាន់មួយ នៅក្នុងរចនាសម្ព័ន្ធនៃថ្នាក់ដឹកនាំរបស់ក្រុមហ៊ុន។ កាលពីដើមឡើយ រាល់បច្ចេកវិទ្យាដែលសម្រិតសម្រាំងឡើង ត្រូវបានស្ថិតក្រោមការគ្រប់គ្រងដោយ​ លោក ជួន រតនៈតែមួយរូបប៉ុណ្ណោះ ដោយឡែក នាពេលថ្មីៗនេះ ក្រុមហ៊ុន Codingate បានបង្រួបបង្រួមបុគ្គលដែលមានទេព្យកោសល្យចំនួន ៣ នាក់ ឲ្យធ្វើការជាធ្លុងមួយរួមគ្នាដើម្បីដឹកនាំក្រុមការងារទាំងអស់ ស្របតាមចក្ខុវិស័យឆ្ពោះទៅរកថ្ងៃអនាគតដ៏ត្រចះត្រចង់លើវិថីឌីជីថលនេះ។

ជំហានបន្ទាប់របស់ក្រុមហ៊ុនដែលត្រូវបានធ្វើឲ្យលេចរូបរាងឡើងនោះគឺការបង្កើតបច្ចេកវិទ្យា បញ្ញានិម្មិតថ្មីសម្រាប់ការប្រើប្រាស់ក្នុងប្រតិបត្តិការទូទៅនៃសហគ្រាសនោះគឺ (GateMaster.ai) ដែលនេះប្រៀបបាននឹង ដំណើរនៃការកសាងក្ដីស្រមៃរបស់ក្រុមហ៊ុន Codingate (Envisioning Codingate 2024) តាមរយៈវត្តមានរបស់បច្ចេកវិទ្យានេះដែរ មានគោលបំណងជំរុញឲ្យក្រុមហ៊ុន Codingate កាន់តែមានកិត្យានុភាពក្លាយជាក្រុមហ៊ុនបច្ចេកវិទ្យាជួរមុខលើការច្នៃប្រឌិតឡើងនូវបច្ចេកវិទ្យា បញ្ញានិម្មិត (AI) ដែលគុណភាពដ៏ប្រណិត និងស្វ័យប្រវត្តិកម្មអាជីវកម្មដ៏សម្បូរបែប សម្រាប់ជាមាគ៌ាជំរុញឱ្យមានការជឿនលឿនផ្នែកបច្ចេកវិទ្យាលេចឡើងក្នុងដំណើរប្រតិបត្តិការអាជីវកម្មរបស់អតិថិជន។

ស្របពេលដែលតម្រូវការទីផ្សារ និងការរីកចម្រើននៃបច្ចេកវិទ្យានៅតែបន្តវិវឌ្ឍន៍ឥតឈប់ឈរ ក្រុមហ៊ុន Codingate បានកត់សម្គាល់ឃើញនូវសារៈសំខាន់លើការកែលម្អចក្ខុវិស័យ និងបេសកកម្មរបស់ខ្លួនឲ្យកាន់តែប្រសើរឡើង ដើម្បីបោះជំហានឆ្ពោះទៅរកភាពឈានមុខគេ ក្នុងវិស័យដ៏មានសក្ដានុពលមួយនេះ។ តាមរយៈការសម្របនិងភាពបត់បែនឲ្យត្រូវនឹងបរិបទនៃតម្រូវការនាពេលអនាគតទាំងនេះ ក្រុមហ៊ុន Codingate បានត្រៀមខ្លួនរួចជាស្រេច ក្នុងការបំពេញតម្រូវការររបស់អតិថិជន និងផ្តល់នូវដំណោះស្រាយប្រកបដោយភាពសម្បូរបែប និងច្នៃប្រឌិតខ្ពស់​ទៅកាន់ម្ចាស់អាជីវកម្មគ្រប់ជាន់ថ្នាក់។

ប្រធានការិយាល័យបច្ចេកវិទ្យា (CTOs) ដែលត្រូវបានតែងតាំងថ្មីទាំង ៣ រូបនេះសុទ្ធសឹងជាក្រុមការងារបង្គោលដ៏ឆ្នើមនៅក្នុងក្រុមហ៊ុន និងមានបទពិសោធន៍ ក៏ដូចជាជំនាញដ៏ជាក់ប្រាកដ ស្របតាមតួនាទីរៀងខ្លួនៗ។

ដោយបានប្រឡូកលើវិស័យច្ចេកវិទ្យាយ៉ាងស្ទាត់ជំនាញ អស់ពេលជាង​ 10 ឆ្នាំកន្លងមក រួមផ្សំនឹង ឆន្ទៈនៃការស្រឡាញ់ចូលចិត្ត លើការបង្កើតគេហទំព័រ និងកម្មវិធីទូរស័ព្ទជូនដល់សហគ្រាសគ្រប់ធុន លោក សេង ភីរុណ ដែលធ្លាប់កាន់តំណែងជា នាយកប្រតិបត្តិនៃក្រុមហ៊ុន Codingate ពេលនេះរូបលោក នឹងនៅតែបន្តជាមួយក្រុមហ៊ុនដដែល ក្នុងនាមជា ប្រធានការិយាល័យបច្ចេកវិទ្យាជាន់ខ្ពស់ផ្នែកអភិវឌ្ឍន៍កម្មវិធីសម្រាប់អាជីវកម្មគ្រប់ជាន់ថ្នាក់ ហើយការដឹកនាំរបស់លោក ភីរុណ នឹងក្លាយជាកាតាលីការដ៏សំខាន់មួយក្នុងការជំរុញវឌ្ឍនភាពផលិតភាពការងារផ្ទៃក្នុង និងធានាឲ្យបាននូវការផ្តល់ដំណោះស្រាយឌីជីលថលប្រកបដោយគុណភាពខ្ពស់។

លោក  ជួន រតនៈ ត្រូវបានតែងតាំងជាប្រធានការិយាល័យបច្ចេកវិទ្យាជាន់ខ្ពស់ ផ្នែកស្រាវជ្រាវ និងការអភិវឌ្ឍន៍នវានុវត្តន៍ មិនតែប៉ុណ្ណោះ ជាមួយនឹងបទពិសោធន៍ជាង 10 ឆ្នាំនៅក្នុការងារអភិវឌ្ឍន៍កម្មវិធីកន្លងមកនេះដែរ  លោកត្រូវបានទទួលរហ័សនាមថាជា អ្នកបង្កើតធនធានយុវជនជំនាញផ្នែកបច្ចេកវិទ្យាតជំនាន់ថែមទៀតផង។ ជាមួននឹងចំណេះដឹងដែល លោក រតនៈធ្លាប់បានឆ្លងកាត់ នឹងក្លាយមធ្យោបាយដ៏សំខាន់ក្នុងការជំរុញគំនិតផ្តួចផ្តើមស្រាវជ្រាវរបស់ក្រុមហ៊ុន Codingate និងសម្រាប់ប្រសិទ្ធភាពនៃការបង្កើតថ្មីស្របតាមតម្រូវការរបស់អតិថិជន។

លោក ស៊ីម សុគារ៉ា គណៈគ្រប់គ្រងឆ្នើមដែលមានជំនាញខ្ពស់ក្នុងការអភិវឌ្ឍន៍បច្ចេកវិទ្យា Front-end និងជាសមាជិកស្ថាបនិកនៃក្រុមហ៊ុន Codingate ដែលមានបទពិសោធន៍ជាង 10 ឆ្នាំ ត្រូវបានតែងតាំងជាប្រធានការិយាល័យបច្ចេកវិទ្យាជាន់ខ្ពស់ផ្នែក Front-end Technology Development ។ ជំនាញរបស់លោក សុគារ៉ា នៅក្នុងវិស័យនេះនឹងដើរតួយ៉ាងសំខាន់ក្នុងការធ្វើអោយប្រសើរឡើងក្នុងការនាំយកនូវការអភិវឌ្ឍន៍បច្ចេកវិទ្យាដែលផ្ដោតលើទស្សនីយ៍ភាពនិងការមើលឃើញដោយចក្ខុវិញ្ញាណកាន់តែទំនើប អស្ចារ្យនិងមានភាពទាក់ទាញ ដែលការណ៍នេះនឹងផ្ដល់ឲ្យអ្នកប្រើប្រាស់គ្រប់រូបទទួលបាននូវបទពិសោធន៍ដ៏ល្អបំផុតជាមួយនឹងបច្ចេកវិទ្យាដែលត្រូវបានរចនាដោយក្រុមហ៊ុន Codingate ឡើងមកនេះ ។
ជាមួយនឹងការរៀបចំរចនាសម្ព័ន្ធថ្នាក់ដឹកនាំថ្មីនេះ ក្រុមហ៊ុន Codingate បាននឹងកំពុង ត្រៀមខ្លួនរួចជាស្រេច ក្នុងការបោះពួយទៅរកជំហានបន្ទាប់នៅក្នុងវិស័យនេះ ដោយពាំនាំមកនូវបច្ចេកវិទ្យា បញ្ញានិម្មិត (AI) ដ៏មានគុណប្រយោជន៍យ៉ាសម្បូរបែប រួមផ្សំនឹងគុណភាពនៃរាល់ដំណោះស្រាយឌីជីថលរបស់ក្រុមហ៊ុន ក៏ដូចជាស្វ័យប្រវត្តិកម្មអាជីវកម្មប្រកបកិត្យានុភាពខ្លាំងក្លាផងដែរ។ តាមរយៈការរួបរួមគ្នារវាងទេពកោសល្យទៅតាមជំនាញដ៏ចំណាននៃ ប្រធានការិយាល័យបច្ចេកវិទ្យា​ ទាំង ៣ រូប ក្រុមហ៊ុន Codingate ពិតជាមានការជឿជាក់យ៉ាងមុតមាំក្នុងការសម្រេចឲ្យបាននូវ បដិវត្តឧស្សាហកម្មតាមបែបផែនឌីជីថល  និងការផ្តល់នូវដំណោះស្រាយបច្ចេកវិទ្យាទំនើបចុងក្រោយបង្អស់ទៅកាន់សំណាក់អតិថិជន។

លោក សុខ សុភមង្គល ប្រធាន និងជានាយកប្រតិបត្តិនៃក្រុមហ៊ុន Codingate ក៏បានមានប្រសាសន៍ដែរថា “យើងពិតជាមានសេចក្តីសោមនស្សរីករាយណាស់ ក្នុងការប្រកាសតែងតាំងឲ្យលោក សេង ភីរុណ លោក ជួន រតនៈ និងលោក ស៊ីម សុគារ៉ា ជាថ្នាក់ដឹកនាំជាន់ខ្ពស់របស់ក្រុមហ៊ុន”។ ការដែលដាក់ភាពប៉ិនប្រសប់និងជំនាញច្បាស់លាស់ពីបុគ្គលបញ្ចូលគ្នា ដែលមានការបូកផ្សំនឹង បទពិសោធន៍លើវិថីនេះដែលពួកគេធ្លាប់បានឆ្លងកាត់កន្លងមក នឹងដើរតួនាទីយ៉ាងសំខាន់ក្នុងការជំរុញចក្ខុវិស័យរបស់យើងឆ្ពោះទៅកាន់គោលដៅដែលក្រុមហ៊ុនបានគ្រោងទុកនាពេលអនាគត ហើយកត្តានេះជាហេតុធ្វើឲ្យប្រាកដថា ក្រុមហ៊ុន Codingate នៅតែនាំមុខគេលើការរីកចម្រើនផ្នែកបច្ចេកវិទ្យា ដោយផ្តល់នូវភាពជោគជ័យទៅកាន់ម្ចាស់អាជីវកម្មតាមបែបឌីជីថលទំនើប”។

ក្រុមហ៊ុន Codingate Co., Ltd គឺជាក្រុមហ៊ុនបច្ចេកវិទ្យាឈានមុខគេដែលមានឯកទេសក្នុងការអភិវឌ្ឍន៍កម្មវិធី បច្ចេកវិទ្យា AI និងដំណោះស្រាយការគ្រប់គ្រងស្វ័យប្រវត្តិកម្មអាជីវកម្ម។ ជាមួយនឹងក្រុមអ្នកជំនាញដែលមានចំណេះដឹងច្បាស់លាស់ ក្រុមហ៊ុន Codingate ប្តេជ្ញាចិត្តក្នុងការផ្តល់នូវដំណោះស្រាយប្រកបដោយភាពច្នៃប្រឌិតដែលជំរុញឱ្យមានការរីកចម្រើនផ្នែកបច្ចេកវិទ្យាទៅកាន់អតិថិជនយ៉ាងពិតប្រាកដ។